Канал “Культура” Беларускага радыё 3 лістапада правядзе тэматычны эфірны дзень “140 фактаў пра класіка”, прысвечаны 140-годдзю з дня нараджэння народнага паэта Беларусі Якуба Коласа.
На працягу дня ў перадачах спецыялізаванай радыёхвалі прагучаць вядомыя і незнаёмыя шырокай грамадскасці факты з біяграфіі і творчасці песняра айчыннай літаратуры. У эфір запрошаны нашчадкі класіка, будуць выкарыстаны архіўныя матэрыялы з голасам паэта, прагучаць выбраныя радкі і музычныя прысвячэнні Якубу Коласу.
Упершыню на канале “Культура” новыя цікавыя факты пра жыццё і дзейнасць свайго славутага прадзеда прывядзе ў праграме “Дыялогі пра культуру” ў 12:30 і 18:30 праўнучка песняра, галоўная захавальніца фондаў Дзяржаўнага літаратурна-мемарыяльнага музея Якуба Коласа Васіліна Міцкевіч.
У праграмах “На паліцах фанатэкі”, якая пачнецца ў 13:30, і “Развагі пра літаратуру” а 15:00 слухачоў чакаюць аповеды пра ўклад Якуба Коласа ў нацыянальную культуру, літаратурна-мастацкія запісы, што захоўваюцца ў фондах Беларускага радыё. Разуменне вершаў класіка сучаснымі дзецьмі слухайце ў межах клуба для дзяцей і падлеткаў “Дасціпныя. Нястомныя. Кемлівыя” ў 16:05 – чытальнікамі выступяць вучні сталічнай гімназіі № 28.
Факталагічную карціну эфірнай акцыі дапоўняць музычныя праекты канала “Культура”, змест якіх складзены з улікам важнай для нацыянальнай культуры даты. Напрыклад, у праграме “Музыка беларускіх кампазітараў” у 15:15 слухачы дазнаюцца, каго з музычных класікаў вершы народнага паэта натхнілі на стварэнне асобных твораў. Узаемасувязям паэтычнай спадчыны Якуба Коласа з музычнай культурай Беларусі будуць прысвечаны таксама праекты “Наша музыка” (эфір – у 08:25 і 13:05), “Музычны вечар” (у 22:15) і іншыя.
Эфір канала “Культура”, прысвечаны 140-годдзю з дня нараджэння Якуба Коласа, не абмяжуецца днём 3-га лістапада. Аматарам літаратуры з 2-га лістапада канал “Культура” ў праграме “Радыёбібліятэка” ў 11:00, 20:30 і ў начным эфіры прапануе чытанне славутай паэмы класіка “Новая зямля”.
У бліжэйшыя выхадныя ў 21:30 у праекце “Радыётэатр плюс” прагучаць радыёпастаноўка “Дрыгва” па аднайменнай аповесці юбіляра і радыёкампазіцыя “Дзяцінства час” паводле аповесці Сцяпана Александровіча “Ад роднай зямлі” з урыўкамі паэмы класіка “Новая зямля”.
На працягу года ў апошнюю нядзелю кожнага месяца выходзяць спецыяльныя выпускі паэтычнага праекта “Прачулым радком” з вершамі народнага паэта.
Пачуць праекты акцыі “140 фактаў пра класіка” і іншыя эфірныя прысвячэнні юбілею Якуба Коласа можна ў FMі анлайн-вяшчанні канала “Культура” на афіцыйным сайце www.radiokultura.by.
Фота - http://www.kolasmuseum.by/
