25.06.2021
На сцэне Нацыянальнага акадэмічнага драматычнага тэатра імя Якуба Коласа прэм’ера – спектакль “Пёс белага вострава” паводле п’есы Аляксея Дударава. Пастаноўку інтэрактыўнай камедыі на дзве дзеі ажыццявіла рэжысёр Святлана Навуменка з Рэспубліканскага тэатра беларускай драматургіі. Галоўныя героі п’есы – малады акцёр Вілен і яго анёл-ахоўнік Пёс. Вілен з першай ролі адчуў смак славы. “Злавіў зорку” , аднак не змог утрымацца на небе. Хто дапаможа, калі ў кожнага свае праблемы? Выйсце – Белы востраў і яго жыхар Пёс. Гэты востраў – нязбыўная мара, дзе кожны знаходзіць сябе і мае шчасце гаварыць толькі праўду. Інтэрактыўны спектакль дазволіць гледачам стаць непасрэднымі ўдзельнікамі сцэнічнага дзеяння. Яны разам з Віленам пройдуць складаны тэатральны шлях, напоўнены гумарам, камічнымі сітуацыямі і арыгінальнымі паваротамі сюжэту. І даведаюцца, ці магчыма здабыць шчасце і наблізіцца да запаветнай мары. Расказвае рэжысёр-пастаноўшчык Святлана Навуменка.
Ролю Пса ў спектаклі выконвае малады акцёр Аляксандр Казлоў, які раскрыў сябе і ў іншым амплуа.
У спектаклі выкарыстоўваюцца цытаты на італьянскай і рускай мовах.
Фота: belta.by
