05.07.2021
Фестываль “Купалле”, або “Александрыя збірае сяброў” пройдзе 10 ліпеня. Традыцыйна – на беразе Дняпра ў аграгарадку Александрыя Шклоўскага раёна.
На малой сцэне на працягу ўсяго дня будуць праходзіць розныя тэматычныя канцэрты. У іх возьмуць удзел юныя таленты Магілёўшчыны, творчыя калектывы Палаца культуры Мінскага трактарнага завода, група Jazz City Band. На галоўнай пляцоўцы адбудзецца гала-канцэрт "Песнi маей краiны". Яго праграму збіралі па заяўках жыхароў аграгарадка Александрыя. Падзея пачнецца ўвечары на галоўнай канцэртнай пляцоўцы і завершыцца феерверкам. Пра асаблівасці расказвае мастацкі кіраўнік Маладзёжнага тэатра эстрады Уладзіслава Арцюкоўская, якая выступіла рэжысёрам канцэрта.
Асноўнымі падзеямі свята стануць цырымонія адкрыцця і ўшанаванне перадавікоў аграпрамысловага комплексу. На імправізаваных вуліцах размесцяцца гандлёвыя рады, гульнявыя атракцыёны, выставы, рэгіянальныя міні-павільёны. "Сімвалам сёлетняга свята абраны рушнік", – расказаў намеснік старшыні Магілёўскага аблвыканкама Валерый Малашка.
На маладзёжнай пляцоўцы "Талака" адбудзецца прэзентацыя трох вну Магілёўскай вобласці. Там жа прэзентуюць кнігі айчынных вядомых і маладых аўтараў. Рэканструктары пакажуць вопратку, зброю і прадметы салдацкага побыту Першай і Другой сусветных войнаў. Свае пляцоўкі арганізуе ў аграгарадку Александрыя Дзяржаўтаінспекцыя Магілёўскай вобласці. Будуць працаваць выставы рэтрааўтамабіляў і сучаснай тэхнікі, пройдуць розныя флэшмобы, а дзеці змогуць размаляваць сапраўдную машыну.
Гасцей свята просяць не забываць пра нашэнне масак і захаванне сацыяльнай дыстанцыі.
Фота: mogilevnews.by
